Þrítugur maður opnar vinnslustöð í Borgarnesi

Hinn þrítugi Davíð Freyr Jónsson opnar í dag vinnslustöð í Borgarnesi. Þrátt fyrir ungan aldur hefur Davíð haslað sér völl í sjávarútveginum og á fyrirtæki hans tvo báta.

„Við vorum fyrst mest í makrílnum en höfum síðan beint kastljósi okkar að krabba- og skelfiskveiðum og erum bara nokkuð efnilegir í því. Útgerðin okkar heitir Artic Seafood og við erum með tvo báta, annan fimmtán tonna og hinn níu tonna,“ segir Davíð í samtali við Vísi.

Davíð er forsprakki hóps opnar vinnsluna.

Í húsnæði vinnslustöðvarinnar verður frumkvöðlasetur einnig starfrækt og opnar það einnig í dag. „Já, þetta er samstarfsverkefni ýmissa aðila. Þeir sem standa að frumkvöðlasetrinu eru Samtök sveitarfélaga á Vesturlandi, Atvinnuráðgjöf vesturlands, Borgarbyggð, Háskólinn á Bifröst, Landbúnaðarháskólinn á Hvanneyri, Matís, Íslenski sjávarklasinn og svo vinnslan okkar sem heitir Whole Seafood,“ útskýrir Davíð. Frumkvöðlasetrið kallast Matarsmiðjan.

Og þú ert svolítill frumkvöðull í þér?

„Það má alveg segja það svosem. Ég hef mikinn áhuga á þessum málum allavega.“

En af hverju sjávarútvegurinn?

„Í stuttu máli: Tækifæri. Þetta er spenanndi vettvangur.“

Fer sjálfur út sjó

Davíð er duglegur við að fara út á sjó sjálfur. „Já, mér finnst þetta mjög skemmtilegt. Ég er líka með þrjá sjómenn í vinnu,“ útskýrir hann. 

Í vinnslunni sem opnar í dag verður unnið með Makríl, skelfisk og krabbategundum auk aukafurða af bolfisk. Frumkvöðlasetrið er hugsað sem vettvangur fyrir frumkvöðla og vöruþróunar eða smáframleiðslu á allskyns matvælum eða tengdum afurðum, eins og snyrtivörum. 

Auk þessverður annað frumkvöðlasetur opnað í Borgarnesi í dag. Það frumkvöðlasetur kallast Hugheimar og er markmiðið með opnun þess að veita frumkvöðlum aðgang að aðstöðu og fjölbreyttum hópi sérfræðinga á vegum samstarfaðila. „Markmiðið er að skapa drífandi umhverfi fyrir framþróun hugmynda og örvun nýsköpunar og vesturlandi,“ eins og segir í tilkynningu.

Mörg tækifæri í Borgarnesi

Vinnslan sem Davíð opnar í dag er tvö þúsund fermetrar. „Reksturinn er auðvitað að slíta barnskónum. Við erum að sjá hversu mikið umfangið verður til framtíðar,“ útskýrir hann.

En af hverju Borgarnes?

„Borgarnes er umferðarstöð fyrir fiskflutninga á landinu. Ótrúlega mikið af fiski er flutt í gegnum Borgarnes. Svo er töluvert að fagmenntuðu fólki í bænum. Þar er hefð og þekking fyrir framleiðslu á matvælum . Síðan má segja að þetta hús hafi bara hentað fullkomlega fyrir reksturinn okkar.“

Í dag er svokallaður frumkvöðladagur í Borgarnesi. Hugheimar opna klukkan 16:30 og Matarsmiðjan, frumkvöðlasetrið í vinnslunni í eigu Davíðs og félaga, verður opnað 17:30.