124 milljóna króna tap á rekstri Sjóvár á fyrsta ársfjórðungi

124 milljóna króna tap varð á rekstri Sjóvár á fyrsta ársfjórðungi þessa árs, samanborið við 617 milljóna hagnað á sama tíma og árið áður. Þetta kemur fram í tilkynningu frá félaginu.

Hermann Björnsson, forstjóri Sjóvár, segir tap í fjárfestingastarfsemi félagsins leiða til þess að afkoma félagsins sé neikvæð um 124 milljónir króna. „Ávöxtun á innlendum fjármálamarkaði var almennt slæm á fyrsta ársfjórðungi og afkoma félagsins á fjórðungnum því undir væntingum. Ræður þar mestu lækkun á verði ríkisskuldabréfa. Sveiflur á verðbréfamörkuðum er miklar en fjárfestingastefna félagsins miðar að því að ná stöðugri langtímaávöxtun“, segir Hermann.

Samkvæmt árshlutareikningi, sem samþykktur var af stjórn félagsins í dag, var 451 milljóna króna tap af fjárfestingastarfsemi á meðan hagnaður af vátryggingastarfsemi var 318 milljónir króna.