Fjárhagsleg staða sveitarfélaganna styrkist

Samkvæmt nýútkominni skýrslu frá Íslandsbanka um málefni og fjármál sveitarfélaganna hefur rekstur þeirra og fjárhagsstaða verið að styrkjast allt frá árinu 2009.

Í skýrslunni er stuðst við ársreikninga frá árinu 2013 hjá 60 sveitarfélögum sem spanna um 99% íbúa landsins. Þar kemur fram að flest sveitarfélaganna hafa lagt áherslu á hagræðingu í rekstri og greitt niður skuldir. Heildar fjárfestingar og framkvæmdir sveitarfélaganna hafa verið í lágmarki.

Í fyrsta sinn frá árinu 2008 lækka skuldir sveitarfélaganna á milli ára. Á árinu 2013 lækkuðu skuldir og skuldbindingar sveitarfélaganna um 39 milljarða króna frá árinu á undan, sem samsvarar um 7% lækkun. Tekjur sveitarfélaganna hafa aukist á milli ára, eða um 71 milljarð króna frá árinu 2010, sem er aukning um 32%. 

Niðurstöður skýrslunnar fyrir A og B hluta reksturs sveitarfélaganna benda til þess að rekstur 97% sveitarfélaganna geti staðið undir núverandi skuldsetningu. Sé einungis litið til A hlutans kemur fram að rekstur 88% sveitarfélaganna getur staðið undir skuldsetningu.

Skýrsluna í heild sinni má lesa hér.