Viðskipti með hlutabréf í Kauphöllinni í febrúar námu 1.595 milljónum á dag

Viðskipti með hlutabréf í Kauphöllinni í febrúarmánuði námu 31.892 milljónum eða 1.595 milljónum á dag.

Það er 28% hækkun frá fyrri mánuði, en í janúar námu viðskipti með hlutabréf 1.246 milljónum á dag. Þetta er 58% hækkun á milli ára þegar viðskipti í febrúar 2013 námu 1.006 milljónum á dag.

Mest voru viðskipti með hlutabréf Icelandair Group - 14.605 milljónir, Haga - 7.219 milljónir, Marel - 2.490 milljónir og Reginn - 1.325 milljónir.

Úrvalsvísitalan (OMXI6) lækkaði um 5,8% milli mánaða og stendur nú í 1.208 stigum.

Á Aðalmarkaði Kauphallarinnar var Landsbankinn með mestu hlutdeildina 33% (27,8% á árinu), Arion banki með 32,5% (30,7% á árinu), og Íslandsbanki með 13,5% (17,4% á árinu).

Í lok febrúar voru hlutabréf 17 félaga skráð á Aðalmarkaði og First North Iceland og nemur heildarmarkaðsvirði þeirra 570 milljörðum króna samanborið við 452 milljarða í febrúar 2013.

Viðskipti með skuldabréf námu 148 milljörðum í síðasta mánuði sem samsvarar 7,4 milljarða veltu á dag. Þetta er 5% lækkun frá fyrri mánuði þar sem viðskipti í janúar námu 7,8 milljörðum á dag, en 9% lækkun á milli ára þegar viðskipti í febrúar 2013 námu 8,1 milljarði á dag.

Á skuldabréfamarkaði var Landsbankinn með mestu hlutdeildina 23,1% (19,8% á árinu), Arion banki með 19,4% (18,9% á árinu) og MP banki með 18,8% (19,9% á árinu).

Aðalvísitala skuldabréfa (NOMXIBB) lækkaði um 1,04% í febrúar og stendur í um 1.020 stigum. Óverðtryggða skuldabréfavísitala Kauphallarinnar (NOMXINOM) lækkaði um 0,71% í mánuðinum en sú verðtryggða (NOMXIREAL) lækkaði um 1,09%.