Gætu skipt Fokker út fyrir stærri Bombardier-vélar

Stjórnendur Flugfélags Íslands skoða nú hvort Fokk­er 50-vélum félagsins verði skipt út fyrir vélar frá kanadíska fyrirtækinu Bombardier Aero­space. Engin ákvörðun hefur verið tekin um kaup en koma kanadísku vélanna gæti fjölgað ferðum í millilandaflugi.

„Þetta hefur í rauninni alltaf legið fyrir og við erum að velta fyrir okkur hvenær eða hvort við munum skipta Fokker-vélunum út. Einhvern tímann kemur að því að vélarnar fara úr rekstri en þær voru framleiddar á árunum 1991-1992,“ segir Árni Gunnarsson, framkvæmdastjóri Flugfélags Íslands.

Félagið á fimm fimmtíu sæta Fokker 50-farþegavélar og tvær 37 sæta vélar af gerðinni Bombardier Q200. Bombardier-vélarnar voru framleiddar árið 1996 en Flugfélag Íslands keypti þær árið 2012. Þær eru að sögn Árna hentugar til lendingar á stuttum flugbrautum og því kjörnar í áætlunarflug fyrirtækisins til Grænlands.

„Frá því við tókum inn þessar 37 sæta vélar hefur það alltaf legið fyrir að það væri skynsamlegt að horfa til stærri útgáfunnar af þessum Bombardier-vélum sem eru af gerðinni Q400, þar sem Fokk­erinn er ekki framleiddur lengur,“ segir Árni.

Hann segir það einnig inni í myndinni að nota Fokker-vélarnar áfram næstu fimm til tíu árin. Þær henta að hans sögn vel til innanlandsflugs því þær eyða tiltölulega litlu eldsneyti miðað við aldur. Kaup á Bombardier-vélunum gætu hins vegar leitt til þess að fyrirtækið bjóði aftur upp á millilandaflug.

„Við erum fyrst og fremst að horfa á innanlandsmarkaðinn en auðvitað myndi þetta opna á ýmsa möguleika. Við höfum svo sem áður flogið Fokkerunum til Noregs og Glasgow í áætlunarflugi en það eru reyndar um tuttugu ár síðan. Þessi Q400-vél er hraðfleygari en Fokkerinn og því gætu opnast auknir möguleikar á millilandaflugi.“