Strætó og VÍS skrifa undir samning

Strætó og VÍS skrifuðu í vikunni undir samstarfssamning þess efnis að VÍS sjái um allar tryggingar fyrir Strætó bs. næstu 4 árin ásamt forvarnarfræðslu. Áherslubreytingar voru í útboðinu að þessu sinni, að því er segir í tilkynningu frá Strætó, þar sem mikil áhersla var lögð á forvarnir og skuldbindingu tryggingasalans í forvörnum.

„Markmið Strætó er að tryggja ávallt öryggi farþega, starfsmanna og annara vegfarenda í umferðinni og mikil vinna er lögð í það innan veggja Strætó að draga úr slysum. Liður í þeirri vinnu eru öryggisdagar Strætó sem haldnir eru einu sinni á ári, gagngert til þess að vekja bæði starfsfólk Strætó, farþega og aðra í umferðinni til umhugsunar um öryggismál. VÍS mun koma að öryggisdögum Strætó ásamt því að útvega forvarnarfulltrúi til þess að sinna viðvarandi forvarnarstarfi í nánu samstarfi við Strætó, meðal annars með námskeiðahaldi ofl.,“ segir í tilkynningunni.

Strætó og VÍS munu vinna saman að því markmiði að halda fjölda slysa og tjóna í algjöru lágmarki og markar þessi nýi samningur nýtt upphaf í forvarnamálum Strætó bs.