Hafa búið til samfélag tippleikja

Þrír íslenskir frumkvöðlar eru á leið til London að kynna verkefnið sitt betXit á ráðstefnunni Seed Forum sem er vettvangur fyrir frumkvöðla til að kynna verkefni sín fyrir fjárfestum.

Átta verkefnum er að hámarki boðin þátttaka á ráðstefnunni. Verkefnin koma alls staðar frá úr heiminum og eru misjafnlega langt komin í þróunarferlinu.

betXit sérhæfir sig í að búa til samfélag tippleikja þar sem fólk spilar gegn vinum sínum eða öðrum. Leikurinn byggir á einfaldleika að sögn Arnars F. Reynissonar, eins eiganda betXit.

„Markmið okkar hjá betXit er að búa til skemmtilegan og auðveldan leik sem sniðin er að fólki sem hefur gaman af íþróttum, leikjum, félagsskap og skemmtilegri keppni við vini sína,“ segir Arnar.

Óska eftir 190 milljónum

Nú er þau að þróa leikinn með því að hafa fjórar fótboltadeildir opnar. Á næstu mánuðum muni íþróttagreinum og leikjum fjölga. Vonir standa til þess að leikurinn komist í góða dreifingu um allan heim.

Leikurinn verður kynntur 1. apríl. Eigendur leiksins koma til með að óska eftir 190 milljónum frá fjárfestum til að koma leiknum á Alþjóðlegan markað og til að kynna nýjan leik sem byggir á Heimsmeistaramótinu í knattspyrnu í Brasilíu.

„Við eigum í viðræðum við nokkra fjárfesta um að taka þátt í þessu með okkur. Enn er ekkert staðfest né nokkuð sem má ljóstra upp um að svo stöddu. Þetta er skemmtilegt hark og vonandi mun ferðin til London geta hjálpað okkur af stað, segir Arnar.

Markaðurinn fyrir samfélagsleiki er orðinn ansi stór að sögn Arnars. Að meðaltali spila 173 milljónir manns slíka leiki á netinu í hverjum mánuði.

betXit var boðið á samskonar ráðstefnu í San Fransisco í Bandaríkjunum fyrr á árinu. Stefna betXit er  hins vegar að einbeita sér að evrópska markaðnum og evrópskum fjárfestum eins og er og því var ákveðið að fara ekki þangað.