Icelandair sektað um 10 milljónir

Fjármálaeftirlitið (FME) hefur sektað Icelandair Group um 10 milljónir króna vegna brots á lögum um verðbréfaviðskipti.

Fram kemur í ákvörðun FME að Icelandair hafi brotið 122. grein laganna með því að hafa 3. desember 2012 hvorki birt innherjaupplýsingar um væntanleg kaup á flugvélum né tekið ákvörðun um frestun á birtingu upplýsinganna, eftir að stjórn félagsins hafði ákveðið að ganga til lokasamningaviðræðna við flugvélaframleiðendur.

FME segir að á þessum tíma hafi legið ljóst fyrir að gengið yrði til samninga við Boeing um flugvélakaup en Iclandair hafði áður upplýst að ákvörðunar væri að vænta um hvort félagið myndi einvörðungu styðjast við Boeing 757-vélar til ársins 2022 eða nota þær auk smærri flugvéla.

„Telja verður að upplýsingarnar sem mynduðust þann dag hafi verið upplýsingar sem fjárfestar myndu líta til við ákvörðun um fjárfestingu í félaginu,“ segir í ákvörðun FME.