Allt á fullu við uppbyggingu hjá Icelandair á Flugvöllum

Framkvæmdir á lóð Icelandair á Flugvöllum í Hafnarfirði er í fullum gangi.

Þjálfun flugmanna flugfélagsins mun færast þangað þegar flughermir félagsins kemur í bygginguna.

„Byggingin er reist yfir flugherminn fyrir Boeing 757-þotur en þjálfun hefur farið fram í Kaupmannahöfn undanfarið en flyst með þessu hingað heim,“ segir Guðjón Arngrímsson, upplýsingafulltrúi Icelandair.

Hann segir bygginguna verða komna upp í ágúst og félagið gerir ráð fyrir að starfsemin geti hafist í nóvember. „Við erum komin með 21 þotu af gerðinni 757 í farþegaflugið og fleiri í fraktinni. Þetta er því orðin töluverð þjálfun og það er hagkvæmt að taka hana hingað heim,“ segir Guðjón.