Nýtt líftæknihús rís í Vatnsmýrinni

Steypuvinna við eitt stærsta hús sem risið hefur hér á landi frá hruni hófst í morgun, en þá var byrjað að reisa stórhýsi lyfjafyrirtækisins Alvogen við Sæmundargötu í Vatnsmýrinni.

Þar mun steypan streyma í mótin næstu átta mánuði, enda er húsið engin smásmíði, alls um ellefu þúsund fermetrar. Uppsteypa þess er flókin í framkvæmd, enda krefst hátækniiðnaður á borð við lyfjagerð sértækra úrlausna í þessum efnum; einkum er varðar raka og loftgæði.

Hátæknisetrið mun hýsa alþjóðlegar skrifstofur Alvogen. Þar mun einnig fara fram þróun- og framleiðsla líftæknilyfja í samvinnu við Háskóla Íslands.

Í Hátæknisetrinu munu um 200 starfsmenn Alvogen starfa á næstu árum. Heildarfjárfesting Alvogen vegna verkefnisins er áætluð um 25 milljarðar króna, þar með talið uppbygging á aðstöðu á Íslandi fyrir um 6 milljarða króna.

Verktaki hússins er Þ.G. Verktakar og steypuframleiðandinn BM Vallá ehf, en bæði fyrirtækin eru í þessu tilviki að ráðast í eitt stærsta verkefni sem þau hafa sinnt á síðustu áratugum.

Alls fara um 9000 m3 af steypu í fullbyggt hátæknisetrið – og er hún sérvalin til að mæta ýtrustu kröfum Alvogen um framleiðslustöðvar lyfja á þess vegum.