Enn leiðir McIlroy á Honda Classic

Þriðja daginn í röð leiðir Norður-Írinn Rory McIlroy Honda Classic mótið sem fram fer á PGA National vellinum í Flórída en þegar að 18 holur eru eftir er McIlroy samtals á 12 höggum undir pari eftir að hafa leikið þriðja hring á 69 höggum eða á einu höggi undir pari. Hann á tvö högg á næsta mann sem er Bandaríkjamaðurinn stórefnilegi Russell Henley sem er samtals á 10 höggum undir eftir mögnuð tilþrif á þriðja hring þar sem hann setti meðal annars niður 160 metra högg á 14.holu fyrir frábærum erni. Í þriðja sæti er Russell Knox frá Skotlandi á níu undir pari eftir hring upp á 68 högg í dag.

Það er óhætt að fullyrða að það á eftir að verða mikil spenna á morgun en nokkrir þekktir kylfingar eru ekki langt frá toppbaráttunni, þar ber helst að nefna fyrrum besta kylfing heims, Luke Donald sem er á 7 höggum undir pari sem og fyrrum PGA meistarinn Keegan Bradley, en þeir ásamt fleirum gætu hæglega blandað sér í baráttuna um sigur með góðum hring á morgun.

Tiger Woods hristi af sér slenið eftir erfiða byrjun í mótinu en hann lék þriðja hring á 65 höggum eða fimm höggum undir pari. Hann er samtals á fimm höggum undir pari og þarf að eiga draumahring á morgun til þess að eiga séns í efstu menn.

Á morgun verður lokahringurinn spilaður en atvinnukylfingurinn Birgir Leifur Hafþórsson mun lýsa honum í beinni útsendingu á Golfstöðinni. Hefst útsending klukkan 18:00.