Sænskt fyrirtæki vill endurvinna úr skipastáli á Dalvík

Sænska fyrirtækið T.S. Shipping, sem endurvinnur stál frá úr sér gegnum skipum, hefur lýst yfir áhuga á að koma upp starfsemi á Dalvík. Ef af verður mun það hafa gríðarlega áhrif í sveitarfélaginu en í viðtali sem DB blaðið, bæjarblað Dalvíkinga, tók í júní síðastliðnum við Svanfríði Ingu Jónasdóttur, þáverandi sveitarstjóra, myndu um 150 manns fá vinnu hjá fyrirtækinu þar fyrir norðan. Yrðu þau fyrir bæði kyn og fólk með margvíslega menntun.

Níu manna sendinefnd frá fyrirtækinu fór norður í júní og ræddi við sveitarstjórann, tæknimenn og lögfræðing. Heimildir Fréttablaðsins herma að fyrirtækið gæti verið að leita hófanna einnig víðar á Eyjafjarðarsvæðinu og eins á Austfjörðum.

Bjarni Theódór Bjarnason, núverandi sveitarstjóri, segir málið vera á algjöru frumstigi.

„Ég er nýkominn um borð og nú eru allir í fríi en svo í september munum við eiga viðræður við fyrirtækið og þá munu báðir aðilar eflaust fá svör við þeim fjölda spurninga sem enn er ósvarað.“

Fyrirtækið mun aldeilis ekki sitja auðum höndum hér á landi en í viðtali DB blaðsins kemur fram að þegar framleiðslan verður komin í fullan gang muni hún nema 560 til 600 þúsund tonnum af endurunnu stáli á ári, auk annarra efna. Það gæti hæglega samsvarað sextíu skipum á ári af ýmsum stærðum.

T.S. Shipping sóttist eftir lóð á Grundartanga á sínum tíma en stjórn Faxaflóahafna hafnaði þeirri umleitan í september í fyrra, á þeim forsendum að framkvæmdirnar kölluðu á miklar lóðaframkvæmdir, breytingar á deili- og aðalskipulagi og ekki lægi nægilega ljóst fyrir, að mati hafnarstjórnar, hver umhverfisáhrifin yrðu. Svanfríður segir þó að þau ættu að vera lítil og í viðtalinu segir hún starfsemina mengunarfría og hávaðamengun í lágmarki.

Um starfsemina sagði hún enn fremur: „Gerðar verða þurrkvíar sem skipin eru dregin upp í, tæki og vélar hreinsuð úr þeim og seld í netsölu um allan heima, en geymd í skemmu á starfsstað þangað til þau seljast. Síðan eru skrokkarnir hlutaðir í sundur og efnið sett í endurvinnsluferla, hvort sem það er stál, aðrir málmar eða önnur efni.“