Víkingur seldur og Lundey á leið í sölu

HB Grandi hefur selt uppsjávarskipið Víking AK til Danmerkur fyrir rúmlega 2,1 milljón danskra króna, jafnvirði um 43 milljóna íslenskra króna.

Fyrirtækið ætlar einnig að selja annað sögufrægt skip, Lundey NS, en það hefur ekki enn verið sett í sölu.

Víkingur var smíðaður í Þýskalandi árið 1960 og er mikið aflaskip. Hann hefur legið bundinn við bryggju síðan loðnuvertíð síðasta árs lauk.

„Það liggur fyrir að við erum að fá nýtt uppsjávarskip afhent í mars næstkomandi og það mun leysa bæði Víking og Lundey af. Það er ekkert kælikerfi í Víkingi fyrir afla en það er orðið algjört skilyrði í meðferð afla í dag,“ segir Vilhjálmur Vilhjálmsson, forstjóri HB Granda. Hann segir Víking fara til Danmerkur í næstu viku.