Lítil breyting á gengi á milli mánaða

Krónan stóð næstum óbreytt í mánuðinum, og stóð í 155,3 krónum á evru í lok mánaðarins í samanburði við 155,0 í lok febrúar. Þetta kemur fram í Hagsjá hagfræðideildar Landsbankans.

Um þriðjungur af veltu mánaðarins átti sér stað á einum degi, en fimmtudaginn 27. mars skiptu 34 milljónir evra um hendur. Þetta er fjórða mesta velta á einum degi síðan byrjun árs 2009. Þar af keypti Seðlabanki Íslands 15 milljónir evra.

Innan mánaðar veiktist krónan fyrri hluta mánaðar, en styrktist undir lok mánaðar í nokkrum miklum viðskiptum. Þetta er langt frá því að vera óvenjulegt munstur innan mánaðar.

Síðan í byrjun árs 2013 hefur krónan styrkst síðustu fimm virka daga mánaðarins 13 sinnum, en einungis veikst tvisvar. Líklegast er að hér séu fyrirtæki í útflutningi að selja gjaldeyri í lok mánaðar til þess að eiga fyrir launum og öðrum kostnaði í krónum um mánaðarmót.