Svipmynd Markaðarins: Styður Njarðvíkurliðin og Barcelona

„Núna boða stjórnvöld miklar breytingar sem tengjast verslun og þjónustu eins og niðurfellingar á vörugjöldum, lækkun á tollum og samning með landbúnaðarvörur erlendis. Það eru því spennandi tímar fram undan,“ segir Margrét Sanders, formaður Samtaka verslunar og þjónustu (SVÞ) og framkvæmdastjóri hjá Deloitte.

Margrét var sjálfkjörin formaður SVÞ á aðalfundi samtakanna í mars. Hún tók þá við keflinu af nöfnu sinni Margréti Kristmannsdóttur, sem hafði verið formaður samtakanna frá 2009.

„Ég hef verið spurð hvort það sé ekkert að gera hjá mér í vinnunni fyrst ég gat tekið að mér formennsku hjá SVÞ. En svo er ekki. Þetta bætist bara við sem áhugamál en það er verra ef þetta fer að hafa áhrif á forgjöfina í golfinu,“ segir Margrét og hlær.

Hún sér um allt sem tengist daglegum rekstri Deloitte og hefur starfað hjá fyrirtækinu í fimmtán ár.

„Ég var ráðin eftir að ég flutti heim frá Norður-Karólínu þar sem ég lauk MBA-námi við Western Carolina University,“ segir Margrét. Þar áður hafði hún stundað háskólanám í Frakklandi, við Íþróttakennaraháskóla Íslands og Kennara­háskólann.

„Það sem gerir fyrirtækið frábært, og það var mjög mikil framsýni hjá eigendunum sem fyrir voru, er að menn voru á sínum tíma tilbúnir til að gera breytingar. Okkur tókst mjög vel að vinna saman við að byggja upp þetta stóra og öfluga fyrirtæki sem Deloitte er í dag með um 200 starfsmenn.“

Margrét ólst upp í Reykjanesbæ en er fædd á Ísafirði. Hún er Njarðvíkingur og dyggur stuðningsmaður Njarðvíkur­liðanna í körfubolta.

„Við höfum verið að lána menn hingað og þangað um landið til að efla körfuboltaíþróttina,“ segir Margrét ánægð með sitt félag.

„Ég horfi einnig mikið á knattspyrnu og finnst það alveg ótrúlega skemmtileg íþrótt. Ég elska spænska boltann og ég held með Barcelona en eiginmaðurinn segir að þetta sé ekki almennilegur fótbolti.“

Margrét er gift Sigurði Guðnasyni, starfsmanni Tryggingamiðstöðvarinnar. Þau eiga saman tvö börn, Albert Karl, sem lést árið 2011, og Sigríði. Fyrir átti Sigurður dótturina Sylvíu Rós.

„Sigurður var áður að þjálfa í knattspyrnu. Hann þjálfaði meðal annars fótboltalið í yngri flokkum í Norður-Karólínu á sínum tíma, enda hefði hann ekki þolað að vera heimavinnandi húsfaðir.“

Jónína A. Sanders, aðstoðarframkvæmdastjóri hjá ÁTVR

„Góður námsmaður og vinur er það fyrsta sem mér dettur í hug til að lýsa systur minni. Hún byrjaði ung í félagsmálum og einn af hennar styrkleikum er sá að hún er góður mannasættir. Margrét er bæði raunsæ og heiðarleg, sem er góð blanda með keppnisskapinu sem hún býr yfir í ríkum mæli. Þessir eiginleikar eiga örugglega eftir að koma sér vel hjá SVÞ. 

Við Margrét erum mjög góðar vinkonur og eigum mörg sameiginleg áhugamál. Eitt af því er golf sem við reynum að stunda eins mikið og mögulegt er. Fyrir fólk eins og okkur með mikið keppnisskap þá reynir stundum verulega á þolinmæðina hjá eiginmönnunum.“

Sigrún Ragna Ólafsdóttir, forstjóri VÍS

„Við Margrét erum góðar vinkonur en við kynntumst þegar við unnum um árabil saman hjá Deloitte. Margrét er frábær samstarfsfélagi og vinkona og hún er mjög hvetjandi, sem er mikill kostur. Hún er mikil keppnismanneskja, markmiðadrifin og framsýn.

Hún hefur mikinn áhuga á að stuðla að umbótum í sínu nánasta umhverfi, sem og í samfélaginu í heild, en hún hefur lengi haft mikinn áhuga á ýmsum félagsmálum og stjórnmálum og látið til sín taka á þeim vettvangi. Hún er traust og hefur gott lag á að fá fólk til að vinna með sér að því að ná árangri.“