Ný sjónvarpsstöð í loftið

„Við ætlum að gefa ungu og efnilegu þáttagerðafólki tækifæri til þess að koma efni sínu á framfæri og erum því ekki hefðbundin sjónvarpsstöð í þeim skilningi,“ segir Sigurjón Haraldsson, einn stofnenda nýrrar sjónvarpsstöðvar, iSTV.

Sigurjón segir í Fréttatímanum í dag að stöðin verði ekki með eigið stúdíó heldur sendi út efni frá öðrum. Mikil gróska sé í þáttargerð og ekki allir sem komi að efninu hjá stóru stöðvunum. Ætli þeir að gefa viðkomandi pláss hjá sér.

Fréttir af nýrri sjónvarpsstöð koma tveimur dögum eftir að Konunglega kvikmyndafélagið sagði upp öllu starfsfólki sínu eftir tæplega tveggja mánaða rekstur. Sigurjón segist þó ekki óttast rekstrarumhverfi fjölmiðla hér á landi.

„Við erum með mjög litla yfirbyggingu og engan kostnað við stúdíó og þess háttar,“ segir Sigurjón sem treystir á sölu auglýsinga til að reka nýju stöðina.

Stöðin mun fara í loftið á þjóðhátíðardag Íslendinga þann 17. júní.