Reitun hækkar lánshæfismat Arion banka

Lánshæfismat Arion banka hjá Reitun hefur batnað. Ný einkunn er „i.A3“ með stöðugum horfum.

„Lánshæfismatið hefur því hækkað úr i.BBB1 með jákvæðum horfum,“ segir í tilkynningu bankans. Lánshæfismat sértryggðra skuldabréfa bankans er óbreytt, „i.AA2“, með stöðugum horfum.

Í greiningu Reitunar er meðal annars bent á að úrvinnsla vandræðalána hafi gengið samkvæmt áætlun og gæði lánasafns bankans aukist til muna.

Þá hafi hlutfall íbúðarlána í lánasafni aukist og veðstaða batnað samhliða hækkandi fasteignaverði.

Matið er sagt byggja á háu eiginfjárhlutfalli bankans, háu lausafjárhlutfalli og sterkri markaðsstöðu ásamt líklegum utanaðkomandi stuðningi Seðlabankans ef til þess kæmi.

„Jafnframt er minnkandi óvissa tengd gæðum eigna bankans og afskriftarþörf fer minnkandi. Efnahagshorfur eru ágætar og framtíðarhorfur bankans eru góðar,“ segir í tilkynningu bankans.

Þá eru sagðar horfur á því að lánshæfi bankans gæti batnað enn frekar með auknum gæðum útlánasafnsins, minni samþjöppun og auknum stöðugleika í rekstri og umhverfi.