Birgir ráðinn aðstoðarforstjóri WOW air

Birgir Jónsson hefur tekið við starfi aðstoðarforstjóra WOW air. Birgir hefur víðtæka reynslu úr atvinnulífinu bæði hér á landi og erlendis. Hann starfaði sem svæðisstjóri Össurar í Asíu á árunum 2001 -2004, sem forstjóri Iceland Express 2004-2006 og sem forstjóri Infopress Group sem er ein stærsta prentsmiðja í Evrópu, með starfsemi í þremur löndum, á árunum 2006 -2010. Frá 2010 hefur Birgir starfað sjálfstætt og sem tónlistarmaður, meðal annars sem trommari í þungarokkshjómsveitinni Dimmu. Þetta kemur fram í tilkynningu frá WOW air.

Birgir er rekstrarhagfræðingur og með MBA gráðu frá University of Westminster í Bretlandi. Hann hefur starfað hjá WOW air síðustu tvo mánuði sem ráðgjafi en tekur nú við sem aðstoðarforstjóri félagsins. Hann mun sjá um daglegan rekstur WOW air en félagið er í hröðum vexti. Markmið WOW air á næstu tveimur árum er að fjölga farþegum úr 500 þúsund farþegum í 1,2 milljónir farþega árið 2016.

Skúli Mogensen forstjóri og stofnandi WOW air mun einbeita sér að áframhaldandi vexti félagsins, stefnumótun, nýjum áfangastöðum, stækkun flugflotans og langtíma fjármögnun félagsins.