Vopnað rán á Subway því megrunarkúrinn klikkaði

Maður er í haldi lögreglunnar í Alabama, eftir að hafa viðurkennt að hafa framið vopnað rán á nokkrum Subway veitingastöðum í borginni Birmingham.

Maðurinn, sem heitir Zachary Raphael Torrance, hefur tjáð lögreglumönnum að ástæðan fyrir ránunum var að megrunarkúrinn sem veitingastaðurinn auglýsir gjarnan hafi ekki virkað. Kúrinn er þekktur víða um heim og er talsmaður hans, Jared Fogle, orðinn heimsþekktur. Hann borðaði tvær samlokur frá Subway á dag í heilt ár og missti rúmlega 100 kíló.

Þegar kúrinn hefur verið auglýstur er það alltaf tekið fram að hann virki líklega ekki jafn vel fyrir alla og hann virkaði fyrir Fogel. Miklar líkur eru á því að Zachary Torrance hafi verið þeim hópi sem kúrinn virkaði ekki fyrir, því hann tjáði lögreglumönnum að hann hafi ætlað að ræna Subway-staðina með það að markmiði að fá endurgreitt, hann hafi keypt sér fullt af Subway-bátum til einskis. „Hann sagðist vilja fá peningana sína til baka,“ segir Chuck Hagler, yfirmaður lögreglunnar á svæðinu, í samtali við Reuters, og bætir við:

„Rannsóknarlögreglumaðurinn sem Torrance ræddi við sagði hann hafa haldið þessu fram í fullri alvöru.“

Torrance var handtekinn á fimmtudagskvöld, þegar hann var í Wal-Mart verslun. Annar viðskiptavinur verslunarinnar hafði séð myndir af Torrance, sem lögreglan sendi frá sér. Torrance var að kaupa sér hulstur utan um skammbyssuna sína, sem hann notaði til þess að ræna Subway-staðina.