Forstjóri Mannvits lætur af störfum

Dr. Eyjólfur Árni Rafnsson, sem gegnt hefur starfi forstjóra ráðgjafafyrirtækisins Mannvit síðastliðin tólf ár, mun að eigin ósk láta af störfum sem forstjóri um næstu áramót. Við starfi hans tekur Sigurhjörtur Sigfússon sem hefur verið fjármálastjóri Mannvits frá árinu 2012.

Þetta kemur fram í tilkynningu frá fyrirtækinu. Sigurhjörtur er löggiltur endurskoðandi og viðskiptafræðingur frá Háskóla Íslands. Áður en hann réðst til Mannvits var hann forstöðumaður áætlana og greininga hjá Skiptum.

Í tilkynningunni segir jafnframt að Eyjólfur muni áfram starfa fyrir fyrirtækið á sviði verkefnastjórnunar og markaðs- og kynningarmála.