Renault og Ferrari vilja aflétta breytingabanni

Líkt og Ferrari gaf út fyrir skömmu, vill Renault nú einnig aflétta svokölluðu vélafrosti. Breytingabann er á keppnisvélum Formúlu 1 liða yfir tímabilið, nema að allir vélaframleiðendur samþykki að aflétta því.

Mercedes er þá eini vélaframleiðandinn sem ekki hefur sagst reiðubúinn að lyfta breytingabanninu. Teljast verður líklegt að þar á bæ gæti verið tregi til þess. Liðið leiðir keppni bílasmiða og heimsmeistarakeppni ökumanna og vill sennilega ekki opna fyrir neina ógn.

Liðsstjóri Ferrari, Marco Mattiacci sagði fyrir skemmstu að hann myndi vilja sjá nokkur tækifæri á hverju tímabili til að breyta vélinni. Hann talaði fyrir þessu á liðsstjórafundi í Belgíu.

Yfirmaður Renault, Cyril Abiteboul er sammála Mattiacci og telur það íþróttinni fyrir bestu ef Renault og Ferrari fá að uppfæra vélar sínar. Hann telur að liðin gætu þá nálgast vélarafl Mercedes.

Abiteboul segir þó að slíkar hugmyndir verði að ræða af yfirvegun, gríðarlegur kostnaður muni fylgja því að leyfa örari breytingar. Sérstaklega fyrir liðin sem framleiða ekki vélar sínar sjálf.

„Ég veit að það vill enginn að íþróttin taki ranga stefnu (verði og kostnaðarsöm) en þetta er íþrótt sem þarf að henta öllum sem taka þátt,“ sagði Abiteboul og vísar þá til þess hve mikið forskot Mercedes liðið hefur.

Ef ekkert verður að því að breytingabanninu verði aflétt verða Ferrari, Renault og Mercedes að bíða þangað til tímabilið er búið með sínar uppfærslur. Á milli tímabila má ekki breyta meira en 48% vélarinnar. Renault segist ætla að nota hvert prósent af þeim sem í boði eru.