Flúor í grasi lækkar um fimmtung

Samkvæmt niðurstöðum mælinga eftir sumarið lækkaði magn flúors í grasi í Reyðarfirði um 19 prósent. Sex mælingar eru framkvæmdar í allt. Tvær í mánuði í júní, júlí og ágúst. Meðaltal sumarsins er 30,8 µg samanborið við 37,8 µg sumarið 2013 og 52 µg sumarið 2012.

Þetta kemur fram í tilkynningu frá Alcoa Fjarðarál. Þar segir einnig að tæknilegar bilanir hjá álverinu árið 2012 hafi valdið því að flúor í gróðri hafi farið yfir viðmiðunarmörk.

Þá hafi ýmsar aðgerðir settar af stað til að koma í veg fyrir að slíkt myndi gerast aftur. „Með jákvæðum árangri.“

„Í kjölfar margvíslegra aðgerða af hálfu starfsmanna Alcoa Fjarðaáls síðasta ár erum við afar ánægð að sjá að meðaltal flúors í grasi skuli endurspegla lágan flúorútblástur frá álverinu. Gildin fyrir flúor í grasi eru lægri en viðmiðin fyrir grasbíta segja til um. Þá hefur Matvælastofnun ítrekað staðfest að fólki stafar ekki hætta af neyslu matvæla af svæðinu,“ segir í tilkynningunni.