„Staða ríkissjóðs er grafalvarleg“

Hagfræðideild Landsbankans segir stöðu ríkissjóðs grafalvarlega. Skuldir séu miklar og vaxtakostnaður verulegur. Þá bíði fleiri stór vandamál handan við hornið eins og staða Íbúðalánasjóðs og ófjármagnaðar lífeyrisskuldbindingar.

Í nýrri Hagsjá hagfræðideildarinnar segir að ríkisreikningur fyrir árið 2013 hafi ekki enn verið birtur og sé mun seinna á ferðinni en undanfarin ár.

„Það er óhætt að slá því föstu að niðurstaðan hans verði á svipuðum nótum og síðustu ár og sýni einu sinni enn hve erfitt það er að ná þeim markmiðum í ríkisfjármálum sem stefnt er að.“

Hagfræðideildin segir að þörf sé á mun meiri festu við gerð fjárlaga. Að hækkanir á fjárheimildum eftir samþykkt fjárlaga séu of miklar. Einnig sé þörf á vandaðri áætlunum við fjárlagagerð. Að fjárlagagerð taki ekki nægjanlega mikið tillit til atriða sem ættu að vera vel fyrirsjáanleg.

„Þörf er á miklum endurbótum við framkvæmd ríkisfjármála. Fyrir liggur að vinna hefur farið fram við lagasmíð um nýja umgjörð þessara mála, en það er einnig augljóslega þörf á meiri aga á öllum sviðum.“

Hagsjánna má lesa í heild sinni hér á vef Landsbankans.