Styttist í lækkun höfuðstóls húsnæðislána

Fimmtíu og tvö þúsund umsóknir hafa borist um lækkun höfuðstóls húsnæðislána en í dag er tæpur hálfur mánuður þar til umsóknarfrestur  rennur út. Umsækjendur gætu farið að sjá lækkun afborgana lána í október eða nóvember.

Umfangsmesta aðgerð sem ríkisstjórnin hefur gripið til eru aðgerðir til lækkunar höfuðstóls húsnæðisskulda, en áætlað er að á næstu þremur árum leggi ríkissjóður til 80 milljarða króna í þeim tilgangi. Frestur til að sækja um lækkun höfuðstóls rennur út hinn 1. september eða eftir hálfan mánuð. Tryggvi Þór Herbertsson er verkefnisstjóri skuldaleiðréttingar ríkisstjórnarinnar.

„Um höfuðstólsleiðréttinguna eru rétt um 52 þúsund umsóknir. Þar að baki standa í kringum 80 þúsund kennitölur. Þetta misræmi stafar að því að um hverja umsókn geta verið fleiri en einn umsækjandi, t.d. hjón og sambýlisfólk,“ segir Tryggvi Þór.

Tæplega 17 þúsund manns hafi sótt um að nota séreignarsparnað til niðurfærslu lána, en fólk geti sótt um þessa aðgerð hvenær sem er á næstu þremur árum, en sparnaðurinn nýtist til lækkunar höfuðstóls lána frá þeim mánuði sem sótt er um.

Tryggvi segir ómögulegt að átta sig á heildarupphæðinni á bakvið umsóknirnar um niðurgreiðslu höfuðstóls lána.

„Við gerðum ráð fyrir að það yrði sirka 92 prósent þátttaka af þeim sem gætu sótt um. Við erum ekki komin þangað en við erum einhvers staðar í sjötíu og eitthvað eða áttatíu prósentum. En það eiga eftir að hellast inn umsóknir fram að mánaðarmótum, eigum við von á,“ segir Tryggvi Þór.

Enn er gert ráð fyrir að hámarks leiðréttingin geti orðið fjórar milljónir króna og mun það ekki breytast þótt umsóknir færu yfir þá heildarfjárveitingu sem stjórnvöld ætla í aðgerðina að sögn Tryggva.

Þegar umsóknarferlinu lýkur hefjast útreikningar og síðan tekur við tími þar sem fólk þarf að samþykkja niðurstöðuna og eftir það fara aðgerðirnar að virka með lækkun greiðslubyrði lána.

„Við skulum segja það að í seinni hluta október, nóvember á þetta að fara að skýrast mjög mikið,“ segir Tryggvi Þór.

Þannig að ef allt gengur að óskum gæti fólk farið að sjá lægri greiðslur strax í nóvember?

„Já, við getum sagt að flestir ættu að fara að sjá lægri greiðslubyrði núna í nóvember, desember eitthvað svoleiðis,“ segir Tryggvi Þór Herbertsson.