Síminn ósáttur við fullyrðingar Hringdu

Síminn segir að það sé ekkert sem styðji þá fullyrðingu Hringdu að breytt mæling á internetnotkun „opni á frekari gjaldskrárhækkanir á fjarskiptamarkaði.“

Eftir að fjarskiptafyrirtækið Hringdu sendi frá sér tilkynningu í dag þess efnis að fyrirtækið hyggst bjóða viðskiptavinum sínum upp á ótakmarkað gagnamagn frá og með deginum í dag hefur Síminn sent frá sér tilkynningu til Vísis.

Síminn tilkynnti á dögunum að frá og með 1. september hyggist hann rukka viðskiptavini sína fyrir alla internetnotkun, bæði innlenda og erlenda, upp- og niðurhal. 



Fram kemur í fréttatilkynningunni frá Hringdu ehf. að fyrirtækið hafi lýst því yfir að þessi tilhögun Símans sé slæm fyrir neytendur og að breytingarnar bæði dragi úr gegnsæi og opni á frekari gjaldskrárhækkanir á fjarskiptamarkaði.

Í tilefni af ummælum sem birt eru úr fréttatilkynningu frá Hringdu vill Síminn taka fram að:

• Það er ekkert sem styður þá fullyrðingu Hringdu að breytt mæling á internetnotkun „opni á frekari gjaldskrárhækkanir á fjarskiptamarkaði.“

• Þvert á móti. Þessi breyting, sem stefnt er á í september, hentar 98% af viðskiptavinum Símans og stór hópur viðskiptavina mun geta lækkað reikning sinn frá því sem nú er, þar sem þeir geta farið í hagstæðari þjónustuleið.

• Ástæðan er sú að pakkarnir sem viðskiptavinum standa til boða eru stækkaðir verulega og því rúmast notkun þorra viðskiptavina innan þessa. Grunnpakkinn mun frá 1. júlí innihalda 15 GB en hafði áður 1 GB. Stærð hans fimmtánfaldast. 10 GB leiðin ríflega sjöfaldast og verður 75 GB. Bæði 50 GB og 100 GB leiðirnar þrefaldast og verða annars vegar 150 GB og hins vegar 300 GB. Og sú stærsta sem áður var 200 GB verður 600 GB.

• Þau ca. tvö prósent viðskiptavina sem gætu fundið aukningu eftir breytinguna eru ofur-notendur sem standa undir 25% allrar notkunar á neti Símans. Einn slíkur viðskiptavinur getur verið með gagnanotkun á við nokkur þúsund heimili.

• Þessi nýja mæling er sanngjörn, eykur gegnsæi á markaði og er viðskiptavinum í hag.