LEGO-kubbar sagðir menga hug barna

Greenpeace-samtökin hafa ýtt úr vör alþjóðlegri herferð gegn danska leikfangaframleiðandanum Lego. Samtökin segja að með samstarfi sínu við Shell taki Lego þátt í að „menga hug barna“. Lego hafi selt leikföng í tugmilljónatali sem fegri ímynd olíufélags sem standi fyrir olíuborunum á norðurslóðum. Skora þau á Lego að slíta öll tengsl við Shell.

Forstjóri Lego, Jørgen Vig Knudstorp, segir í yfirlýsingu að það sé eindregin skoðun fyrirtækisins að þetta sé mál milli Greenpeace og Shell og harmar að nafn Lego sé notað sem tæki í hverskyns ágreiningi milli samtaka. Lego gangi út frá því að Shell starfi á ábyrgan hátt hvar sem er í heiminum en grípi annars til viðeigandi ráðstafana. Hann undirstrikar að Lego muni standa  við langtímasamning sinn við Shell. 

Samstarf Lego og Shell hefur staðið meira og minna í hálfa öld og falist í framleiðslu margskyns tegunda legokubba og leikfanga með vörumerki Shell.  Þannig hefur aðdáendum þessara vinsælu kubba boðist að setja saman hluti eins og olíubíla, bensínstöðvar, olíuskip og meira að segja olíuborpalla, allt með nafni Shell. Nýlegt leikfang Lego er formúlu-kappakstursbíll með merki Shell.

Shell er langt frá því eina vörumerkið sem farið hefur á legokubba. Mörg af þekktustu fyrirtækjum heims, þar á meðal flest olíufélög, hafa nýtt sér Lego í kynningarskyni. Einnig íslensk fyrirtæki en framleiddar hafa verið Lego-leikfangaflugvélar merktar Icelandair. Meira að segja Greenpeace-samtökin eru ekki saklaus af því að notfæra sér plastkubbana vinsælu til að breiða út sinn boðskap. 

Þess má geta að plast er afurð olíuiðnaðarins.