Flugsætakaup stjórnvalda hjá Icelandair fólu ekki í sér ríkisaðstoð

Eftirlitsstofnun EFTA (ESA) hefur komist að þeirri niðurstöðu að kaup íslenskra stjórnvalda á flugmiðum á grundvelli rammasamninga við Icelandair feli ekki í sér ríkisaðstoð í skilningi EES-samningsins. Stofnunin hefur haft málið til athugunar eftir að kvörtun barst seinni hluta árs 2012.

Í tilkynningu frá ESA segir að stofnanir og fyrirtæki í meirihlutaeigu ríkisins hafi á grundvelli rammasamninganna keypt flugmiða af Icelandair þegar þess var þörf.

Flugmiðarnir hafi verið keyptir á sömu kjörum og með sömu skilmálum og buðust öðrum stórum viðskiptavininum Icelandair. „Ekki verður annað séð en að rammasamningar íslenska ríkisins við Icelandair hafi verið eðlilegir viðskiptagerningar á markaðsforsendum sem fólu ekki í sér ívilnun til handa Icelandair. Þar af leiðandi fólu umræddir samningar ekki í sér ríkisaðstoð.“

Stofnunin komst jafnframt að þeirri niðurstöðu að ekki væri tilefni til að rannsaka meinta mismunun Flugmálastjórnar Íslands við afgreiðslu á flugréttindum enda hefði Samgönguráðuneytið á sínum tíma fellt ákvörðun Flugmálastjórnar úr gildi og Samkeppniseftirlitið hefði auk þess tekið á málinu með fullnægjandi hætti.“