Lýsing tekur formlega við eignasafni Lykils

Lýsing hf. tók í dag formlega við eignasafni Lykils frá MP banka.

Vísir greindi frá kaupunum 24. mars síðastliðin en nú er komið fram lögbundið samþykki Fjármálaeftirlitsins og Samkeppniseftirlitsins.

Lykill býður bílasamninga og bílalán auk kaupleigusamninga til fjármögnunar á öku- og atvinnutækjum. Fram kemur í tilkynningu frá Lýsingu að starfsemin verði áfram rekin undir vörumerkinu Lykill.

„Viðskiptavinir Lykils eiga ekki að verða fyrir neinni röskun við færslu viðskipta þeirra yfir til Lýsingar. Réttindi og skyldur samkvæmt samningum breytast ekki vegna flutningsins. Þeir viðskiptavinir sem hafa nýtt sér beingreiðslur hjá Lykli verða sjálfkrafa áfram í beingreiðslu hjá Lýsingu. Greiðslustaður skuldaskjala Lykils verður framvegis hjá Lýsingu í nýju húsnæði félagsins við Ármúla 1.“

Í fréttatilkynningunni kemur einnig fram að greiðsla reikninga, samningar vegna skuldbreytinga og önnur samskipti sem snúa að frágangi skuldbindinga fara því ekki lengur fram hjá MP banka heldur Lýsingu.