Seðlabankinn kaupir krónur fyrir 6,7 milljarða í gjaldeyrisútboði

Hinn 15. maí 2014 bauðst Seðlabanki Íslands til að kaupa evrur í skiptum fyrir íslenskar krónur til fjárfestingar til langs tíma í íslensku atvinnulífi eða gegn greiðslu í ríkisverðbréfum í flokknum RIKS 33 0321. Jafnframt kallaði Seðlabanki Íslands eftir tilboðum frá aðilum sem vildu selja íslenskar krónur gegn greiðslu í reiðufé í erlendum gjaldeyri. Útboðin fóru fram fyrir hádegi í dag og voru þau liður í losun hafta á fjármagnsviðskiptum samkvæmt áætlun Seðlabankans um losun gjaldeyrishafta frá 25. Mars 2011. Þetta kemur fram á vef Seðlabankans.

Niðurstaða útboða um kaup á evrum var sú að alls bárust 95 tilboð að fjárhæð 37,6 milljónir evra og var tilboðum að fjárhæð 35,9 milljónir evra tekið. Útboðsverðið var ákveðið með þeim hætti að öll samþykkt tilboð voru tekin á sama verði (e. single price), sem var ákvarðað 186 kr. fyrir hverja evru. Sem greiðslu fyrir gjaldeyrinn í ríkisverðbréfaleiðinni fá fjárfestar afhent verðtryggð ríkisverðbréf RIKS 33 0321. Samtals voru seld bréf í flokknum fyrir 232 milljónir króna að nafnvirði. Sem greiðslu fyrir gjaldeyrinn í fjárfestingarleiðinni fá fjárfestar íslenskar krónur til fjárfestingar til langs tíma í íslensku atvinnulífi. Samtals voru keyptar evrur að andvirði 6,7 ma.kr.

Niðurstaða útboðs um kaup á krónum fyrir evrur var sú að alls bárust 24 tilboð að fjárhæð 7,1 ma.kr. og var tilboðum að fjárhæð 6,7 ma.kr. tekið. Útboðsverðið var ákveðið með þeim hætti að öll samþykkt tilboð voru tekin á sama verði (e. single price), sem var ákvarðað 186 kr. fyrir hverja evru.