Fataverslun aukist um 5% á árinu

Á fyrstu fimm mánuðum ársins jókst velta dagvöruverslunar um 3,4 prósent að raunvirði og áfengisverslunar um 3,8 prósent. Frá þessu er greint í fréttatilkynningu Rannsóknaseturs verslunarinnar.

Þar segir að fataverslun hafi heldur farið að rétta úr kútnum eftir langt tímabil lægðar. Fataverslun jókst að raunvirði um 4,9 prósent það sem af er þessu ári.

„Verslun með dýrari vörur eins og húsgögn og heimilistæki eru einnig á hraðri uppleið. Frá áramótum hefur velta húsgagnaverslunar aukist um 15,6 prósent að raunvirði og raftækjaverslunar um 12,3 prósent,“ segir í tilkynningu rannsóknarsetursins.

„Í maí var óvenjumikill vöxtur í sölu á svokölluðum brúnum raftæknum, sem eru til dæmis sjónvörp, hljómflutningstæki ásamt ýmsum minni raftækjum. Meðal skýringa geta verið að ný og endurbætt raftækjaverslun var opnuð í Reykjavík í mánuðinum og dró til sín fjölda viðskiptavina. Þá kunna fermingar að hafa sitt að segja sem voru fremur seint í ár, auk þess sem áhugafólk um heimsmeistarakeppni í knattspyrnu kunna að hafa notað tækifærið að endurnýja hjá sér skjáinn á tilboðskjörum sem buðust í raftækjaverslunum í maí.“