Már ætlar að sækja aftur um

„Ef allt er skoðað er það niðurstaða mín að ég ætla að sækja um,“ sagði Már Guðmundsson, seðlabankastjóri, sem var gestur hjá Birgi Inga Hrafnssyni í Eyjunni á Stöð 2 í kvöld. Hann ætlar að sækja aftur um stöðu Seðlabankastjóra, sem var auglýst 2. júní. Þá sagði hann að honum hefði ekki verið mögulegt að sækja ekki um.

Már sagðist verða að sækja um því annars myndi hann alltaf velta fyrir sér hvernig hefði farið. Það væri svo annarra að taka ákvörðunina.

Þá sagðist hann vilja sjá ný skref í breyttu skipulagi Seðlabankans. Már er ekki búinn að senda inn umsókn, en umsóknarfresturinn er til mánaðarmóta.