Fjármögnun nýrra Stracta-hótela ólokið

„Við ætlum að skoða fjármögnun á næstu tveimur hótelum á næstu mánuðum og þá munum við að öllum líkindum fá fjárfesta með í málin,“ segir Hreiðar Hermannsson, framkvæmdastjóri Stracta Konstruktion ehf.

Hreiðar og sonur hans, knattspyrnumaðurinn Hermann Hreiðarsson, ætla að byggja alls tíu hótel víða um land, eins og áður hefur komið fram. Hótel á Húsavík og á Orrustustöðum í Skaftárhreppi eru næst á dagskrá. Ekki er búið að ganga frá fjármögnun hótelanna tveggja en áætlaður heildarkostnaður er um fjórir milljarðar króna.

„Við ákváðum að gera í sjálfu sér ekkert í því fyrr en hótelið á Hellu yrði tilbúið og við sæjum allar reynslutölur þaðan, hver kostnaðurinn var í raun og hvernig áætlaðar bókanir voru,“ segir Hreiðar.

Hann og Hermann tóku á mánudag við fyrstu gestum Stracta-hótelsins á Gaddstaðaflötum við Hellu. Þar hafa þeir byggt 126 herbergja hótel fyrir um 1.570 milljónir króna.

„Það er nánast búið að ganga frá skipulagsmálum á Húsavík en þau eru ekki enn komin í gegn fyrir Orrustustaði. Það er mest pressa á að við opnum í Skaftárhreppi og ég reikna með að framkvæmdir hefjist þar í haust.“

Hótel Stracta verða byggð að hluta með húseiningum úr vinnubúðum sem notaðar voru við byggingu álvers Alcoa á Reyðarfirði. Stracta Kon­struktion keypti 25 þúsund fermetra af vinnubúðunum árið 2012. Félagið hefur nú ákveðið að selja um tíu þúsund fermetra þýska fyrirtækinu PCC sem undirbýr byggingu kísilmálmverksmiðju á Bakka við Húsavík.

„Þetta er bara til þess að flýta fyrir losun á svæðinu og þess vegna seljum við ákveðinn hluta því væntanlega verðum við búnir að ganga frá öllu á Reyðarfirði á þessu ári,“ segir Hreiðar, spurður hvort salan þýði að breytingar verði gerðar á áætlunum félagsins.

Alls 81 herbergi var bókað á Hellu á mánudag en hótelið verður ekki formlega opnað fyrr en síðar í mánuðinum.

„Formlegur opnunardagur verður ekki fyrr en búið er að helluleggja, þökuleggja og ganga frá heitum pottum. En þetta er ótrúlega flott byrjun og frá næstu mánaðamótum er hvert einasta herbergi bókað og fram í júlí. Svo er fínt útlit framundan og staðan er því góð.“