Líkur á að fleiri feti í fótspor Símans

Breytingar á gjaldskrá Símans verða að teljast ansi áhættusamar, enda róttækar og samkeppnin á markaðnum mikil. Þessi leið er þó ekki alls óþekkt á íslenskum fjarskiptamarkaði, en þessi sama leið er farin á 3G og 4G neti Nova.

„Við teljum þessa leið ekki áhættusama heldur réttláta og í hag viðskiptavina okkar og neytenda. Það er erfitt fyrir mig að meta hvað keppinautarnir gera, en þetta sú mæling sem viðskiptavinir þekkja á farsímanetinu og auðveldar allan samanburð neytenda,“ segir Gunnhildur Arna Gunnarsdóttir, upplýsingafulltrúi Símans.

Síminn hf. kemur til með að rukka fyrir alla internetnotkun, innlenda og erlenda, frá og með 1. september en hingað til hefur erlend internetnotkun einungis verið gjaldfærð. Við þessa breytingu er talið að gagnanotkun heimila muni mælast þrefalt meiri en nú.  Þá hækkar gjaldskrá þeirra og eru áhrifin 2 prósent á meðalreikning hvers heimilis. Gagnamagnið verður þó aukið, þrefalt til fimmtánfalt, til að koma til móts við viðskiptavini.

Innlent niðurhal er enn sem komið er innifalið í þjónustu Vodafone. Hrannar Pétursson, upplýsingafulltrúi Vodafone, segir sambærilegar breytingar hafa verið í umræðunni, en þó hafi engar ákvarðanir verið teknar.

„Það hefur svo sem lengi verið talað um það að einn daginn kæmi að því að meðhöndla innlent og erlent með sama hætti. Þetta er í takt við það sem gerist víða úti í heimi,“ segir Hrannar.

„Almennt séð, þá held ég, og algjörlega burtséð frá Símanum, má færa fyrir því rök að þetta kerfi sé einfaldara. Það er oft óljóst hvort gögnin komi frá útlöndum eða ekki. Það má því alveg færa fyrir því rök að það sé eðlilegast að gera þetta svona,“ segir Hrannar jafnframt.

Innlent niðurhal er innifalið í internetþjónustu 365 og segir Ari Edwald, forstjóri 365 miðla, enga breytingu verða þar á. „Slíkar breytingar eru ekki fyrirhugaðar hjá 365 miðlum og verður innlent niðurhal áfram innifalið í þjónustu okkar," segir Ari.