Basis semur við Microsoft um skýjaþjónustu

Þjónustu- og ráðgjafarfyrirtækið Basis hefur samið við Microsoft um aðgang að skýjaþjónustunni Windows Azure. Basis er þjónustu- og ráðgjafarfyrirtæki í upplýsingatækni sem á og rekur 560 fm gagnaver miðsvæðis í Reykjavík en Basis sérhæfir sig í rekstri tölvukerfa. Fyrirtækið hefur undanfarin misseri breytt hýsingarumhverfi sínu til að nýta tækifærin sem felast í skýjaþjónustum.

„Færst hefur í aukana að fyrirtæki nýti sér skýjaþjónustur þar sem hægt er að hýsa gögn og hugbúnað með miðlægum hætti. Þá nýta fyrirtæki sér skýjaþjónustur til þess að þurfa ekki að fjárfesta í dýrum innviðum til að ráða ráða við sjaldgæfa álagstoppa sem geta myndast í kerfum þeirra,“ segir í tilkynningu frá Basis.

„Viðskiptavinir Basis hafa undanfarið sótt í ráðgjöf um nýtingu slíkra skýjalausna en sumir kjósa að fara blandaða leið þar sem hluti gagna og kerfa er hýstur innanhúss en hluti er geymdur í skýinu. Starfsmenn Basis hafa veitt ráðgjöf um uppsetningu sem hentar ólíkum þörfum fyrirtækja en flest eiga þau það sameiginlegt að aðgengi, geymsla og öryggi gagna er lykilþörf í dag, sama í hvaða geira þau starfa.“