Svisslendingar kaupglaðastir

Rannsóknarsetur Verslunarinnar birti í dag greiðslukortaveltu erlendra ferðamanna í apríl í ár.

Heildaraukning erlendrar kortaveltu hér á landi í apríl var næstum 6,7 milljarðar króna, sem er 29,1 prósent hærri upphæð en í sama mánuði í fyrra. Hæstri upphæð var varið til gistiþjónustu eða liðlega 1,2 milljörðum. Álíka upphæð var varið í ýmsa sérhæfða ferðaþjónustu, eins og skoðunarferðir og þriðji hæsti útgjaldaflokkurinn var verslun, um einn milljarður króna.

Meðaltals kortavelta á hvern erlendan ferðamann í apríl var um 112 þúsúnd krónur. Svisslendingar skera sig nokkuð úr þegar horft er til meðalkortaveltu á hvern ferðamann. Hver Svisslendingur keypti vörur og þjónustu fyrir að jafnaði 314 þúsund krónur með greiðslukortum hér á landi í apríl.

Rússar eru í öðru sæti með meðalkortaveltu á hvern ferðamann upp á 213 þúsund krónur og Spánverjar í þriðja sæti með 168 þúsund krónur. Útgjöld á hvern ferðamann voru álíka mikil í krónum talið og í apríl 2013.