Síminn útvíkkar vottun fyrirtækisins á upplýsingaöryggi

Stjórn Símans hefur samþykkt að útvíkka ISO vottun fyrirtækisins og mun ISO27001 vottun stjórnkerfis upplýsingaöryggis ekki aðeins gilda á fyrirtækjamarkaði heldur einnig ná til þjónustu við einstaklinga.

Í tilkynningu frá Símanum segir að fyrirtækið sé eina íslenska fjarskiptafyrirtækið með ISO vottað stjórnkerfi upplýsingaöryggis og með útvíkkun vottunarinnar tekur Síminn mikilvægt skref í að treysta enn frekar öryggi viðskiptavina.

„Það þýðir að einfaldara verður að halda utan um skipulag sem varðar öryggismál, hvort sem það heyrir undir vörur á fyrirtækjamarkaði eða þjónustu sem við veitum á einstaklingsmarkaði. Vottunin er þekkt og því vita viðskiptavinir okkar að hverju þeir ganga,“ segir Guðbjörn Sverrir Hreinsson, öryggisstjóri Símans í tilkynningunni.

„Við munum innleiða staðalinn á einu og hálfu til tveimur árum. Við byrjum á greiningum og hefjumst svo strax handa. Því fyrr sem okkur tekst að innleiða staðalinn því betra,“ segir hann, en Síminn hefur unnið eftir vottuðu stjórnkerfi upplýsingaöryggis frá árinu 2002.

Orri Hauksson, forstjóri Símans, kynnti þessa ákvörðun á ráðstefnu Skýrslutæknifélags Íslands í dag, miðvikudaginn 21. maí.

„Þessi staðall tryggir trausta vinnu og að við notum rétt handtök og náum betri árangri á markaði. Það höfum við reynt á fyrirtækjamarkaði. Við hjá Símanum teljum okkur nú þegar í fremstu röð þegar kemur að upplýsingaöryggi og skrefið sem við tökum nú nýtist Símanum inn í framtíðina og mun auka virði fyrirtækisins,“ segir Orri.