Bryndís Pjetursdóttir ráðin til Icelandic Water Holdings

Bryndís Pjetursdóttir hefur verið ráðin sölu- og markaðsstjóri alþjóðasviðs Icelandic Water Holdings

Icelandic Water Holdings flytur út vatn undir merkinu Icelandic Glacial. Jón Ólafsson og Kristján Ólafsson eru stærstu hluthafar fyrirtækisins ásamt bandaríska drykkjavöruframleiðandanum Anheuser Busch.

Þetta er nýtt starf hjá fyrirtækinu og mun Bryndís sjá um markaðssetningu, samskipti og samfélagslega ábyrgð fyrirtækisins á alþjóðavísu, að utanskildum Norður-Ameríkumarkaði, samkvæmt tilkynningu frá fyrirtækinu.

Bryndís hefur starfað á sviðum samskipta og markaðsmála um árabil, síðast sem markaðsstjóri Höfuðborgarstofu sem ber ábyrgð á að markaðssetja Reykjavík sem áfangastað á alþjóðavettvangi.

Hún lauk MA-gráðu í alþjóðasamskiptum frá Háskóla Íslands árið 2011 og MSc-gráðu í stjórnun markaðssamskipta frá Copenhagen Business School í Danmörku árið 2006.

Bryndís hefur þegar hafið störf hjá Icelandic Water Holdings.