Símafélagið tengir Plain Vanilla við umheiminn

Íslenska leikjafyrirtækið Plain Vanilla og Símafélagið hafa gengið frá samkomulagi um að Símafélagið veiti Plain Vanilla ljósleiðaratengingar vegna starfssemi sinnar hér á landi.

Þetta kemur fram í tilkynningu sem fyrirtækin sendu frá sér í dag.

„Áreiðanleiki og öryggi fjarskipta er gríðarlega mikilvægt fyrir fyrirtæki eins og okkar sem starfar við þróun og rekstur hugbúnaðarlausna fyrir farsíma og önnur nettengd tæki. Símafélagið og sérfræðingar þess hafa veitt okkur áreiðanlega og framúrskarandi þjónustu þrátt fyrir örar breytingar okkar megin,“ segir Steinn Eldjárn Sigurðarson, yfirmaður kerfisrekstrar Plain Vanilla.

Ingvar Bjarnason, yfirmaður tæknisviðs Símafélagsins, segir mikla ánægju ríkja í hans röðum með samstarfið.

,,Fyrirtækið er ört vaxandi og hefur verið að gera afar flotta hluti á alþjóðlegum markaði með hinu gríðarlega vinsæla Quizup appi.  Að eiga pínulítinn þátt í áframhaldandi velgengni þeirra með því að veita trausta og örugga þjónustu er okkur í senn ánægja og heiður,“ segir Ingvar.