Skjárinn hringdi í bannmerktan símnotanda

Skjánum var óheimilt að nota nafn og símanúmer einstaklings sem bannmerktur var í þjóðskrá. Þetta kemur fram í úrskurði Persónuverndar. Kvartað var yfir ítrekuðum símtölum með beinni markaðssetningu og barst Persónuvernd kvörtun hinn 12. október 2013, tveimur dögum eftir að kvartanda var boðin áskrift að sjónvarpsefni. Síminn hf. hefur staðfest fyrir hönd Skjásins ehf að hringt hafi verið í kvartanda fyrir mistök, þrátt fyrir að hann hafi verið bannmerktur í Þjóðskrá.

„Hringt hefur verið ítrekað í bannmerkt símanúmer þrátt fyrir að strax við fyrstu hringingu var starfsmanni sem hringdi bent á bannmerkingu og þess krafist að öllum upplýsingum um undirritaðan yrði eytt úr tölvukerfum hringjanda. Þess skal einnig getið að undirritaður hefur verið á svokallaðri „bannskrá þjóðskrár“ frá ofanverðri síðustu öld,“ segir kvörtuninni. 

Þjóðskrá Íslands heldur skrá yfir þá sem ekki vilja að unnið sé með persónuupplýsingar um sig af aðilum sem stunda markaðssetningarstarfsemi og er sú skrá kölluð bannskrá.

Í kjölfar kvörtunarinnar óskaði Persónuvernd eftir nánari upplýsingum frá Skiptum hf., móðurfélagi Símans hf., því kvartandi taldi að símtalið mætti rekja til þess að Síminn hefði miðlað persónuupplýsingum um hann til Skjásins án heimildar. Kvartandinn hafði verið fyrrverandi viðskiptavinur Skjásins og var því fyrirhugað að bjóða honum að koma aftur í viðskipti. Hins vegar hafi láðst að merkja við hann í samræmi við bannskráningu í símaskrá. Símanúmeri hans hefur nú verið eytt úr skrám félagsins í samræmi við ósk hans þar um. Skjárinn tók þá fram að félaginu væri væði heimilt og skylt að varðveita upplýsingar um viðskiptasögu einstaklinga samkvæmt lögum um bókhald nr. 145/1994.