Penninn skilar 123 milljóna króna hagnaði

Penninn ehf. skilaði 123 milljóna króna hagnaði eftir skatta á rekstrarárinu 2013-2014, að því er fram kemur í tilkynningu frá fyrirtækinu. Er þetta er fyrsta sinn í nokkur ár sem fyrirtækið er rekið með hagnaði en það hefur gengið í gegnum mikla endurskipulagningu á síðustu misserum.

Eignir Pennans í lok rekstrarársins, sem stóð frá 1. mars 2013 til 28. febrúar 2014, voru 1805 milljónir króna, heildarskuldir námu 1369 milljónum króna, og eigið fé nam um 436 milljónum króna. Eiginfjárhlutfall félagsins er um 24%. Þá lækkuðu skuldir um 480 milljónir króna á milli ára. 

Penninn rekur 18 verslanir um land allt og á síðasta rekstrarári störfuðu um 300 manns hjá fyrirtækinu.

Þá mun Penninn opna nýja verslun á Laugavegi 77 í byrjun júní, og verður glæsilegt kaffihús opnað í versluninni.