Flugliðar WOW air fara ekki í verkfall á morgun

Vegna fjölda fyrirspurna vill flugfélagið WOW air árétta að boðuð vinnustöðvun Flugfreyjufélags Íslands á morgun, þriðjudaginn 27. maí, á ekki við flugliða WOW air.

Yfirvofandi verkfall mun ekki snerta flugfélagið WOW air á neinn hátt.

Öll áætlun á vegum félagsins er óbreytt og öll flug á morgun, þriðjudag verða samkvæmt áætlun.

Fundahöld voru í kjaradeilu Flugfreyjufélags Íslands og Icelandair um helgina en mikið ber enn í milli í deilunni.

Yfirvinnubann flugfreyja og flugþjóna er í gildi en klukkan sex í fyrramálið hefst átján tíma verkfall hafi ekki samist fyrir þann tíma. Verði verkfall falla niður um 60 ferðir.

Sólarhringsverkfall er boðað 6. júní og annað þann 12. júní. Ótímabundin vinnustöðvun hefst svo 19. júní semjist ekki.