Plain Vanilla valið sprotafyrirtæki ársins á Norðurlöndunum

Plain Vanilla var valið sprotafyrirtæki ársins á Nordic Startup Awards sem fram fór í Osló sl. fimmtudag. Styrktaraðilar keppninnar eru m.a. Facebook, Amazon, Google og Microsoft en þessi stórfyrirtæki velja sigurvegarana í sjö flokkum.

Plain Vanilla stendur á bak við QuizUp sem er sá iPhone-farsímaleikur sem hefur vaxið hraðast í sögunni. QuizUp kom síðan út fyrir Android stýrikerfið fyrr á þessu ári en leikurinn kom út á iPhone í nóvember á síðasta ári.

Hafa milljónir manna sótt appið fyrir iPhone og Android-síma í um 230 löndum.

Um var að ræða aðalverðlaun kvöldsins en sigurvegarar í öðrum flokkum voru m.a. Svíinn Carl Waldekranz sem stofnaði fyrirtækið Tictail og var valinn stofnandi ársins, finnska fjárfestingafélagið Lifeline Ventures var valið besti fjárfestirinn, hópfjárfestingasíðan FundedByMe var besta þjónustuveitan, forritunarhetjan var Daninn Jonas Bruun Nielsen sem bjó til Screenmailer, besti nýliðinn var sænska fyrirtækið Jumpstarter og besti blaðamaðurinn var Greg Anderson sem rekur síðuna Arctic Startup.

„Það er gaman að vera í hópi fólks og fyrirtækja sem eru að gera frábæra hluti. Tækniheimurinn sem áður einskorðaðist að stórum hluta við Sílikon-dalinn er orðinn dreifðari en hann var,“ segir Þorsteinn Baldur Friðriksson.

Þorsteinn segir að Skandinavía sé á góðri leið með að verða eitt af lykilsvæðum í bransanum.

„Þaðan hafa komið margar vörur undanfarið sem slegið hafa í gegn, eins og Spotify og Angry Birds. Maður er oft spurður um þetta skandínavíska sprotavor þegar maður fer í viðtöl við bandaríska fjölmiðla. Það er því mikill heiður fyrir Plain Vanilla að vera valið sprotafyrirtæki ársins á Norðurlöndum og ekki síst þegar maður lítur til þess hvað það eru mörg flott fyrirtæki að koma frá þessum löndum.“