Nýjasta auglýsing Apple tekin upp á Íslandi

Ísland leikur stórt hlutverk í nýjustu auglýsingu tæknirisans Apple.

Ferðabókahöfundurinn Chérie King er þar í aðalhlutverki ásamt Ipad-spjaldtölvu hennar sem hún nýtir á ferðalögum sínum.

Í auglýsingunni má sjá King meðal annars ganga um hafnarsvæði Reykjavíkur, miðborgina, Bláa lónið og strendur Suðurlands.

Áður en hún heldur úr landi skrifar hún stöðuuppfærsluna „Iceland was great“ á Facebook-síðu sína. Ekki ónýt landkynning það. Aðrir áfangastaðir á leið hennar eru meðal annars Marokkó og Tæland.

Hér að neðan má sjá auglýsingu Apple og nánari upplýsingar um Chérie og ferðir hennar má nálgast á heimasíðu fyrirtækisins.