Fyrstu farþegarnir leggja af stað á morgun

Norræna ferðaskrifstofan Nazar hóf nýlega starfsemi hér á landi og á morgun hefjast ferðir félagsins frá Keflavík til Antalya í Tyrklandi. Framkvæmdastjórinn segist ánægður með viðtökurnar en um helmingur þeirra sæta sem í boði eru í sumar hefur selst. Vefurinn turisti.is greinir frá þessu.

„Það er reynsla okkar af öðrum mörkuðum að um leið og fyrstu farþegarnir koma heim þá eykst áhuginn á ferðunum til muna. Aðbúnaðurinn á hótelunum og þjónustan mun koma farþegunum þægilega á óvart og þeir koma því til með að segja öðrum frá fríinu. Sérstaklega kunna börnin að meta það að þau geti verið í barnaklúbbi þar sem talað er við þau á þeirra eigin tungumáli“, segir Kemal Yamanlar, framkvæmdastjóri Nazar, við turisti.is.

Um helmingur þeirra 2500 sæta sem Nazar býður upp á í ferðir frá Íslandi í sumar hafa nú selst. Kemal segir að það sé aðeins lægra hlutfall en á öðrum mörkuðum félagsins en þar sem þetta er fyrsta starfsárið á Íslandi segist hann vera ánægður með viðbrögðin.

Í ár mun Nazar eingöngu bjóða upp á ferðir til Tyrklands og nú þegar er hægt að bóka sæti í ferðir þangað á næsta ári. Í ár verður aðeins flogið yfir sumarmánuðina en á næsta ári mun ferðatímabilið standa yfir frá miðjum maí og fram í október.