Íslensk lækningavara í The Doctors

Fjallað var um eina af lækningavörum fyrirtækisins Kerecis á Ísafirði í bandaríska spjallþættinum The Doctors í liðinni viku.

Varan sem um ræðir er MariGen Omega3 Wound, stoðefni til meðhöndlunar á þrálátum sárum. Fyrirtækið nýtir roð af þorski af Vestfjarðamiðum til framleiðslu á vörum sínum.

The Doctors, sem hérlendis hafa verið sýndir á Stöð 2, veita áhorfendum ráðleggingar og upplýsingar um  heilsufarsmál, aðgerðir og annað sem tengist læknavísindunum. Þættirnir hófu göngu sína árið 2008 og hefur hann meðal annars hlotið Emmy-verðlaun.



„Það er því óhætt að segja að umfjöllunum hafi verið prýðis auglýsing fyrir Kerecis, jafnvel þótt nafn þeirra hafi ekki komið fyrir í þættinum heldur einungis talað um að varan væri framleidd á Íslandi,“ segir í tilkynningu frá fyrirtækinu en milljónir manna um allan heim horfa á þáttinn vikulega.



Kerecis segist í kjölfar þáttarins hafa fundið fyrir auknum áhuga frá Bandaríkjunum.

Hér að neðan má sjá glefsu úr þættinum.