Nýr forstjóri Samskipa tilkynntur í næstu viku

Yfirstjórn Samskipa hefur kynnt áform sín um breytt skipulag Samskipasamstæðunnar, en flutningakerfi verða sameinuð undir tvö meginfélög.

Þetta kemur fram í tilkynningu frá félaginu. Breytingarnar voru kynntar á starfsmannafundi Samskipa síðdegis í dag. Skipulagsbreytingarnar felast í því að samstæðan mun nú verða tvær meginstoðir, Flutningakerfi Samskipa hf og Samskip Multimodal. Öll flutningsmiðlun félagsins verður sameinuð undir merkjum Samskip Logistics. Þar undir fellur starfsemi félagsins sem bæði er rekin undir merkjum Samskipa, Samskip Icepak og FrigoCare sem og eignarhlutur félagsins í frystiskipaflutningafélaginu Silver Sea.

Ásbjörn Gíslason mun taka við stöðu forstjóra Samskip Logistics með aðsetur í Hollandi og svara til stjórnar Samskip Holding BV. Hann verður ábyrgur fyrir flutningsmiðlun, stórflutningum, FrigoCare og Silver Sea í Noregi. Jens Holger mun verða forstjóri Samskipa með aðsetur í Hollandi og svara til stjórnar Samskip Holding BV. Hann verður ábyrgur fyrir öllum flutningakerfum Samskipa.

Á sama tíma er tilnefndur nýr forstjóri Samskipa hf. Nafn nýs forstjóra verður tilkynnt í næstu viku. Yfirstjórn félagsins breytist ekki en hún samanstefndur af Ásbirni Gíslasyni, Kristni Albertssyni og Jens Holger Nielsen, sem svara til stjórnar Samskip Holding BV.

Ólafur Ólafsson, stjórnarformaður félagsins, segir í tilkynningu breytingarnar vera lið í því að gera félagið betur í stakk búið til að ráðast í frekari uppbyggingu á þeim mörkuðum þar sem tækifæri bjóðast.