Viðgerð á jarðstreng tók fjóra mánuði

Viðgerð á jarðstreng á Þeistareykjum, sem bilaði í janúar 2014, lauk ekki fyrr en í síðustu viku. Ástæðurnar voru meðal annars þykk snjólög og frosthörkur. Málinu er lýst á heimasíðu Landsnets. Þar segir að umtalsvert lengri tíma taki að gera við jarðstreng en loftlínu við bestu skilyrði, hvað þá þegar veðurfar og snjóalög setja strik í reikninginn, eins og Landsnetsmenn segjast hafa fengið að reyna.

Jarðstrengurinn, sem er 11,5 km langur, var lagður árið 2012 að Þeistareykjum. Hann er 66 kílóvolta og er fyrst um sinn ætlað að flytja vinnurafmagn inn á virkjunarsvæðið. Strengurinn var aðeins búinn að vera nokkra mánuði í rekstri þegar hann bilaði í byrjun ársins. Leit að biluninni tók allnokkra daga, meðal annars vegna erfðra veðurfarsskilyrða á Norðurlandi eystra og mikilla snjóalaga, segir Landsnet. 

Ástæða bilunarinnar reyndist vera galli í einangrun strengsins en það var hins vegar ekki ljóst á hve löngum kafla einangrunin væri gölluð. Blasti þá við að viðgerðarferlið gæti getið drjúgan tíma, bæði vegna tímafrekrar leitar við að kanna ástand einangrunarinnar og erfiðra aðstæðna en grafa þurfti hálfan annan metra gegnum snjóalög áður en hægt var að byrja að grafa strenginn upp.

Frosthörkur ollu einnig vandræðum því ekki þykir óhætt að hreyfa strenginn ef frost fer undir fimm mínusgráður og hefði þurft talsverðar tilfæringar til að hita upp þann hluta hans sem þurfti að taka upp.

Þar sem ekki bráðlá á að koma strengnum aftur í gagnið var viðgerð frestað fram yfir páska í samráði við framleiðanda strengsins, meðal annars í þeirri von að þá hefðu snjóalög sjatnað og verstu frosthörkur gengið yfir. Það gekk eftir en töluverður snjór var þó enn á Þeistareykjasvæðinu og þurftu línumenn Landsnets að grafa um metra niður í gegnum fönn, áður en þeir gátu farið að kanna ástand strengsins á bilunarstaðnum.

Sérfræðingur frá strengframleiðandanum tók þátt í þeirri vinnu og í framhaldinu var svo gert við strenginn. Lauk þeirri vinnu með því að strengurinn var spennusettur á ný, aðfararnótt 9. maí.