Viðskiptaráð vill beita skattalegum hvötum til að örva fjárfestingu

„Viðskiptaráð telur æskilegt að beita skattalegum hvötum til að örva

fjárfestingar í nýsköpun hérlendis,“ segir í nýri skoðun Viðskiptaráðs Íslands sem birtist í dag og tekið er fram að þeir séu réttlætanlegir þar sem markaðsbrestur er til staðar

„Í þessu tilfelli má færa rök fyrir að þeir sem fjárfesta í nýsköpunarfyrirtækjum skapi einnig þjóðfélagsleg verðmæti sem þeir njóta ekki ávinningsins af sjálfir."

Í skoðuninni kemur einnig fram að gæta þarf þess að skattalegir hvatar af þessu tagi séu skýrt afmarkaðir og í ljósi þess að framleiðni minni fyrirtækja er að meðaltali lægri en stærri fyrirtækja væri óskynsamlegt að skapa skattalega hvata sem beinast að öllum smærri fyrirtækjum.

Hérlendis er opinber stuðningur við fjárfestingu í nýsköpun lítill í alþjóðlegum samanburði og munar þar mest um fyrrnefnda skattalega hvata.

Í skýrslu norrænu ráðherranefndarinnar um frumkvöðlastarfsemi á Norðurlöndunum kemur fram að aðgangur nýsköpunar- og sprotafyrirtækja að fjármagni sé lakastur hér á landi og hefur hann versnað ár frá ári frá árinu 2008.

Tillögur starfshópsins munu þó ekki ná markmiðum sínum að óbreyttu og munar þar mestu um að þær ná ekki yfir fjárfestingar einstaklinga í nýsköpunarsjóðum.

„Án slíkrar heimildar eru einstaklingar hvattir til að taka meiri áhættu með sparifé sitt en þörf er á,“ segir í skoðuninni. Gerir þetta nýsköpunarfyrirtækjum erfiðara að sækja sér fjármagn frá fjárfestum „sem hafa þekkingu á nýsköpun og geta gegnt hlutverki bakhjarla í vaxtarferlinu,“ eins og segir í skoðuninni.



„Saman myndu alþjóðlega samkeppnishæfir skattalegir hvatar og aðrar umbætur á rekstrarumhverfi nýsköpunarfyrirtækja stuðla að hraðari vexti sprotafyrirtækja. Slíkt myndi styðja við uppbyggingu þekkingar- og útflutningsgreina og langtímaforsendur bættra lífskjara hérlendis,“ segir í niðurstöðum skoðunar Viðskiptaráðs.

Nánari upplýsingar má nálgast á vef Viðskiptaráðs.