365 tekur yfir Konunglega kvikmyndafélagið

365 miðlar og hluthafar Konunglega kvikmyndafélagsins hafa komist að samkomulagi um að 365 miðlar taki yfir alla hluti í Konunglega kvikmyndafélaginu. Þetta segir í tilkynningu frá félaginu.

Þann 30. apríl síðastliðinn tilkynnti Konunglega kvikmyndafélagið að félagið leitaði aukins hlutafjár til að styrkja rekstur félagsins, samhliða því sem öllum starfsmönnum þess var sagt upp störfum. Kostnaður við uppsetningu reyndist meiri en áætlaður var og ekki var vilji hluthafa til að skuldsetja áframhaldandi rekstur. Í kjölfar viðræðna aðila um hlutafjáraukningu varð niðurstaðan sú að 365 miðlar tæki yfir alla hluti í félaginu.

Í tilkynningunni segir að nýir eigendur hafi hug á því að efla enn frekar starfsemi miðilsins. Aftur á móti hafi verið ákveðið að gefa Miklagarði sumarfrí frá og með 1. júní næstkomandi og munu nýir eigendur endurhugsa grundvöll þeirrar stöðvar.

„Við erum ánægðir með þessa niðurstöðu,“ segir Sigmar Vilhjálmsson, stofnandi Konunglega kvikmyndafélagsins, í tilkynningunni. „Vonir standa til þess að flest það öfluga starfsfólk sem hefur unnið að þessu verkefni bjóðist áframhaldandi starf við fjölmiðla, og skiptir það höfuðmáli. Það verður gaman að fylgjast með framhaldinu.“

Ari Edwald, forstjóri 365 miðla, segir sömuleiðis í tilkynningunni telja að stofnun stöðvanna tveggja hafi að mörgu leyti verið áhugaverð tilraun.

„Það er hins vegar ljóst að þessi rekstur hefur ekki fjárhagslegan grundvöll við núverandi efnahagsaðstæður,“ segir Ari. „Áhugi okkar á þessu félagi byggir á því að við getum nýtt okkur tæknibúnað sem komið hefur verið upp og samþætt hluta af starfseminni við það sem við erum að gera.“