Tuttugu þúsund sótt um leiðréttingu

Fimmtán mínútum fyrir tvö voru komnar umsóknir fyrir 19.700 kennitölur um leiðréttingu verðtryggðra fasteignaveðlána eða ráðstöfun á séreignarsparnaði á umsóknarvef Ríkisskattstjóra. Skúli Eggert Þórðarson, ríkisskattstjóri, segir ferlið ganga framar björtustu vonum.

Heimasíðan var opnuð klukkan 16:21 í gær og Skúli segir netþjóna hafa verið í jafnvægi síðan.

Síðan hafði verið skoðuð 231 þúsund sinnum af 35.500 gestum í 76 löndum, en flestar umsóknir hafa borist frá einstaklingum sem búa á Íslandi. 93% eru frá Íslandi, 1,6 prósent frá Noregi, 0,8 prósent frá Danmörku og 0,8 prósent frá Bandaríkjunum.

Embættinu hefur einnig borist 648 símtöl um leiðréttinguna og þegar mest var voru 1.012 manns inn á vef Ríkisskattstjóra á sama tíma, sem er töluvert meira en að jafnaði.